Йошкар-Олаште йоча- влакын кеҥеж канышыштым ямдылаш 12 миллион утла теҥге оксам ойырат

Йошкар-Олаште йоча- влакын кеҥеж канышыштым ямдылаш 12 миллион утла теҥге оксам ойырат. Тидын нерген Бюджет да социал йодыш дене головной комиссий- влакын заседанийыштышт ойлымо. Кеҥежым тӱшкан каныме да пашам ыштыме йӧн дене 25 тӱжем тунемшым авалтыме лиеш. Кугу тӱткыш неле илыш йыжыҥыш логалше- влаклан ойыралтеш. 1-ше гыч 21-ше июнь марте Йошкар-Оласе школла негызеш 41 лагерь ышталтшаш. Тушечын 30 лагерьже кечывалым пашам ыштыше лийшаш. Тушко кум тӱжемат 612 тунемше погына, 10 йоча лагерь ешартыш шинчымаш рӱдерлаште кечывалым каныме лиеш. Тушто 170 йоча каналта. Йоча- влак дене пашам ыштымашке школласе писхолог дене социал педагог- влакат ушнат. Лагерьыште йоча- влак 8 шагатат 30 минут гыч 14 шагатат 30 минут марте лийыт. Нуным кечеш кок гана пукшат,- каласен ола мэрын алмаштышыже Людмила Новосёлова. Володя Дубинин лӱмеш тазалыкым пеҥгыдемдыме да туныктымо йоча лагерьыште «Самырык техник- влакын станцийышт», «Азимут», «Олимп» тӧҥежлаште тунемше- влаклан смене, кадет да юнармеец- влаклан военно-патриот смена, йоча мер ушем- влакын лидерыштлан, конкурслаште да олимпиадылаште сеҥыше- влаклан смена лиеш. Чыла тиде пашалан 12 миллион утла теҥге ойыралтеш.