«Унчо тӱс» ончер почылтеш

Шушаш кугарнян, 25-ше октябрьыште Калыкле сӱрет галерейыште самырык сӱретче- влакын пашаштым ончыктышо «Унчо тӱс» ончер почылтеш. Художник- влакын тыгаяк лӱман пленэрышт тений кеҥежым «Унчо- финн-угор тӱнян рӱдыверже» проект кышкарыште эртен ыле. Йошкар-Оласе художественный училищын студентше- влак Морко районын пале верлашкыже миеныт. Тиде- Унчо ял, Чӱкшӧ курык, Карман курык, Йошкар-Сер. Тушто самырык сӱретче- влак марий калыкын илышыже, йӱлаже дене палыме лийыныт да шке сӱретыштым ыштеныт. Ынде оласе калык тиде усталык путешествыийын лектышыжым ончен кертеш. Пленэр жапыште ӱдыр-рвезе- влак 60 наре графике пашам да 136 этюдым ыштеныт.