Социал обслуживаний тӧнежын эн сай воспитательже Российысе конкурсышто республикын чапшым арала
Социал пашаеҥ- влакын кечышт вашеш Марий Элыште «Социал обслуживатлыше тӧнежын эн сай пашаеҥже» Россий кӱкшытан конкурсын республикысе йыжыҥже эртен. Тений конкурс 9 номинаций дене лийын. Тушко 30 утла социал пашаеҥ ушнен. Республикысе йыжыҥыште сеҥышыш Красногорскысо психоневрологий интернатын воспитательже Елена Иванова лектын. Тудо «Социал обслуживаний тӧнежын эн сай воспитательже» номинацийыште сеҥен. Тиддеч посна конкурс комиссий тудым Российысе конкурсыш ушнаш темлен. Елена Фёдоровна тиде интернатыште 15 ий утла пашам ышта.
