Москошто Йошкар-Ола нерген ончер почылтын

Моско олаште Йошкар- Олалан 435 ий темме лӱмеш «Царевококшайск- Краснококшайск- Йошкар-Ола: из глубины веков до наших дней» выставке почылтын. Экспозицийым Марий Элысе Кугыжаныш архивын материалже  негызеш Моско олан тӱҥ архив виктемже ямдылен. Ныл курым утла жапыште олана Озаҥ губернийысе изи илем гыч республикын рӱдолаже марте кушкын. Какшан эҥерыште царьын олажым Фёдор Иоаннович озаланыме жапыште, 1584-ше ий 1-ше ноябрьыште, негызлыме. Эн ончыч тудо оролышо ор-ола лийын. Тудын нерген икымше ушештарымаш 1475-ше- 1598-ше ийласе разрядный книгаште ушештарыме. Выставке лач тиде возымаш дене почылтеш. Ола сарзе укреплений семын кучылталтын. Йырже рокым оптен нӧлтымӧ улмаш, пу пырдыжым ыштыме, тушто лӱйкалыме вер- влак лийыныт. Орышто воевода да тудын гарнизонжо илен. Икымше воеводылан Иван Андреевич Ноготков-Оболенскийым шотлат. Ола кушкын, калык ешаралтын. Сандене илыме верым ор пырдыжын вес могырыштыжо чоҥаш тӱналыныт, слобода- влак шочыныт. Нунымат пырдыж дене авырен налме. 17-ше курымын кокымшо пелыштыже Россий империйын рӱдӧ да йӱдвел-касвел кундемлаж гыч руш- влак илаш толыныт. Нунын негызлыме ялышт тыгак ола кундемыш пурен. 19-ше курым тӱҥалтышыште тыште тӱжемат 200 еҥ илен. А 20-шо курым тӱҥалтышлан кок тӱжем еҥ погынен. 1919-ше ий 17-ше февральыште ола Краснококшайск лӱмым налын, 1928-ше ий 10-шо мартыште Йошкар-Ола лийын.