Санчурскыш кайыме корнын эше ик ужашыжым комиссий сайлан шотлен
Теҥгече корным чоҥышо- влак Марий Эл ден Киров кундемым ушен шогышо кӱлешан кугорнын кугу ужашыжым пашаш колтеныт. Увертарыме ыле: республикыште Президент Владимир Путинын темлыме калыкле проектым шыҥдарыме шотышто кугу паша шукталтеш. Нуным ыштымым Марий Элым вуйлатыше Александр Евстифеев шке терген шога. Поснак кугу паша «Лӱдыкшыдымӧ да сай качестван автомобиль корно- влак» проект почеш ышталтеш, ятыр миллион теҥге дене окса кучылталтеш. Теве теҥгече кугыжаныш комиссий Йошкар-Ола-Санчурск олмыктымо корнын ужашыжым ончен лекмеке, приёмко актеш кидшым пыштен. Тыге ятыр ий дене водитель- влакым тургыжландарыше корно нормо деке лишемеш. Тиддеч ончыч тиде корнын 9 меҥгат 200 метр кужытан ужашыжым эксплуатацийыш налме ыле, теҥгече эше 10 меҥгат 600 метр кужыт корным 24-ше меҥге гыч 34-ше меҥгат 600 метр марте ужашыжым почмо. Ноябрь марте чоҥышо- влак кодшо корныжым ыштен шуктышаш улыт. Тыге Киров область дене чек марте ужаш пӱтынек тӧрлымӧ лиеш. Умбакыже тиде корным «Марий Эл Дорстрой» компаний кучаш да эскераш тӱналеш. Чоҥышо- влак тиде корнылан 6 ий гарантийым пуат. Тиде ужашым ышташ 151 миллион теҥгем кучылтмо. А тичмашыже 458 миллион теҥге каен. Корно деч посна автобус чарныме куд верым олмыктымо.