Шуко шочшан еш- влакын посёлкыштышт уремым волгалтарат
Йошкар-Ола воктене шуко шочшан еш- влаклан чоҥымо посёлкыш тулым пуртымо проектым шыҥдарыме паша мучашыш лишемеш. Российысе социал кӱлешан проект- влакын конкурсыштышт ныл сеҥыше кокла гыч иктыже Марий Эл гыч ыле. Шоя-Кузнецово воктенысе шуко шочшан еш- влаклан чоҥымо посёлкышто урем тымарте волгалтаралтын огыл. Ик меҥге наре кужытым остановко марте йоча- влак пычкемыш урем дене коштыныт. Проектлан 200 тӱжем теҥге кӱлын. Проектым Москошто ужын шуктеныт да контрольыш налыныт. Кызыт тиде кундемыште тулым пурташ 17 меҥгым шогалтыме. Тулым чӱктымӧ шотышто кутырен келыштарымаш кая.