Республикын спортсменже-влак футбол дене Россий первенствын зональный йыжыҥыштыже сеҥышыш лектыныт
Футбол да регби дене олимпий резерв спортшкол гыч спортсмен- влак спортшкол команде- влак коклаште футбол дене Россий первенствын зональный йыжыҥыштыже сеҥышыш лектыныт. Самырык спортсмен- влак тыгак футбол дене икымше лигыш пурышо пӧръеҥ команде- влак коклаште Марий Элын телымсе Превенствыштыже сеҥышыш лектыныт ыле. Икмыняр модшыжо «УОР-СШОР» команде дене пырля тений Марий Элын кубкыжым сеҥен налше- влак радамыште улыт. Южо модшыжо «Дружба» футбол командын еҥже улеш. Тиде Александр Ненашкинын вуйлатыше футбол да регби дене спортшколын, тренер Игорь Комлевын да полышкалышыже Василий Таниковын тыршымышт дене икымше кугу сеҥымаш. Россий Первенствын зональный йыжыҥыштыже «СШОР-2003» команде июнь гыч сентябрь марте кок кругышто модын. Тыге шке тыршымашыж дене Россий первенствын финалыштыже модаш правам сеҥен налын. Тудыжо 28-ше сентябрь гыч 5-ше октябрь марте Самара олаште эрташ тӱналеш.