Козьмодемьянск корнын ныл меҥге ужашыжым олмыктат

Йошкар-Ола – Козьмодемьянск корнын ныл меҥге утла ужашыжым олмыкташ палемдыме. Тиде 40-ше гыч 45-ше меҥге марте ужашыште лийшаш. Ачалыме пашан заказчикше «Марийскавтодор», пашажым «Марий Эл Дорстрой» шукташ тӱҥалеш. Контрактын акше 25 миллионат 500 тӱжем теҥге. Пашам 10-шо октябрь марте мучашлышаш улыт. Тиде кужытышто корнын мландым нӧлтымӧ ужашыже 12 метр, пеҥгыде корныжо 6 метр кумдык. Корно тӱрыш эше тыгыде кӱм шарышаш улыт.