Провой олаште канализаций коллекторым олмыкташ республикысе кучем эше 7 миллион теҥге оксам ойыра
Звенигово олаште канализаций коллекторым олмыкташ республикысе кучем эше 7 миллион теҥге оксам ойыра. Тидын нерген Звенигово районыш паша дене мийымыж годым Марий Элым вуйлатыше Александр Евстифеев увертарен. Тудо канализаций коллекторым олмыктымо верыште лийын да лишыл жапыште правительствын резерв фондшо гыч аварий ситуацийым кораҥдаш 7 миллионат 600 тӱжем теҥгем ойырымо лиеш манын. Звенигово район администрацийым вуйлатыше Владимир Гернтьев ушештарен: канализаций коллекторын пытартыш ужашыже икымше июльлан мучашлыме лиеш. Тушто у насос станций вераҥдалтеш. А кызытсе аварийный ситуаций шотышто паша кок тылзыште мучашлалтеш. Республикым вуйлатыше пашам шошо шумеш ыштен шукташ кӱлеш манын да оласе канализаций сеть шотышто ончыкылык план нерген каласкален. Вес участкыж шотышто проект ямдылалтеш, смета палемдалтеш. Сандене тиде вашке паша огыл, а план почеш ыштышаш паша лиеш. Тыге районышто аварий-влак дене пашам пытараш кӱлеш манын. Звениговысо коллекторышто аварийым кораҥдаш правительстве кум ий жапыште 80 миллион утла теҥге оксам ойырен. Республикым 2023-шо ий марте социал- экономик велым вияҥдыме индивидуал программе почеш очистной сооружений- влакым чоҥаш палемдыме. Тудын акше иктаж 410 миллион теҥге лийшаш.