Марий Элыште «Тӱвыра» калыкле проектым шыҥдараш 690 миллион теҥгем колтымо лиеш

           Марий Элыште «Тӱвыра» калыкле проектым шыҥдараш 690 миллион теҥгем колтымо лиеш. Теҥгече Тӱвыра, печать да калык- влакын пашашт шотышто министерстве коллегийын заседанийже лийын. Тушто Марий Элым вуйлатыше Юрий Зайцев участвоватлен. Торжественный ужаш деч ончыч Юрий Зайцев «Марий книга савыктыш» Савыктыме пӧртын книга выставкыжым ончен. Марий Элым вуйлатыше палемден: республике «Тӱвыра» калыкле проектым чаплын виктарен толеш. Республикыште калыкле проект кышкарыше инвестиций ик миллиардат 500 миллион теҥгем эртен. Пытартыш ийлаште республикыште 8 модельный книгагудо почылтын, 6 йоча сымыктыш школым, ялласе 14 тӱвыра пӧртым капитально олмыктымо. Марий филармонийым чоҥымо, Юриныште историй да сӱрет тоштерым капитально олмыктымо,  Калык- влакын келшымаш пӧртыштым пашаш колтымо, Калыкле тӱвыра Пӧрт, кок креатив индустрий школ, сымыктыш да тӱвыра кластер пашам ыштат. Ончычсо курчак театрым Самырык театрлан пужен ыштат, Волжскысо «Родина» кинотеатрым йоча сымыктыш школлан келыштарат. Тений отрасльлан республикын бюджетше гыч кок миллиардат 600 миллион теҥгем ойырымо, «Тӱвыра» калыкле проектым шыҥдараш 691 миллион теҥгем палемдыме. Тений ялысе вич тӱвыра пӧртым, Янтемир лӱмеш тоштерым капитально олмыкташ палемдыме, кум тоштерлан у оборудованийым, ныл сымыктыш школлан семӱзгар ден тунемме материалым налшаш улыт, кум модельный книгагудым ышташ палемдыме. Республикыште финно-угровед- влакын Россий кӱкшытан шанче конференцйыштым, Марий калыкын Погынжым, Россий кӱкшытан Сабантуйым эртараш ямдылалтыт.
             Фото: Марий Элым вуйлатышын  администрацийжын увер дене пашам ыштыше пӧлкаже.