Юрино районысо 6 тӱжем утла еҥ у поликлиникыште качестван медицина полышым налын кертеш

               Юрино районысо 6 тӱжем утла еҥ у поликлиникыште качестван медицина полышым налын кертеш. Теҥгече Республикым вуйлатыше Юрий Зайцев видеоконференций йӧн дене Юрино районысо эмлыме верын поликлиник пӧлкажым почын. Тымарте поликлинике 1906-шо ийыште чоҥымо келыштарыме зданийыште верланен ыле. Вер ситыдымылан кӧра южо кабинетше вес зданийлаште пашам ыштеныт. 2015-ше ийыште у эмлыме верым чоҥымо, стационар эмлыме йӧн ятырлан саемын. Районысо калык чытен -чытыде поликлиникыште калыкым приниматлыме йӧн саеммым вученыт. У поликлиникым кызытсе жаплан келшыше оборудований дене пойдарыме. Верысе калык полышым чапле верыште налын кертеш. У рӱдер дене куд тӱжем ен пайдаланен кертеш. Тушечын ик тӱжемже йоча- влак улыт. Обслуживатлыме кумдыкыш 42 ял пура. Вуйлатыше палемден: медицина пашаеҥ- влаклан полшаш правительстве тӱткышым ойыра. Кадр ситыдымашым кораҥдаш республикын бюджетше гыч ик гана тӱлымӧ окса пуалтеш. Мед персоналлан служебный илыме верым пуымо йодышат виктаралтеш.
             Фото: Марий Элым вуйлатышын  администрацийжын увер дене пашам ыштыше пӧлкаже.