У Торъял посёлкышто физкультура да тазалыкым пеҥгыдемдыме комплексым чоҥен пытарыме

           У Торъял посёлкышто физкультура да тазалыкым пеҥгыдемдыме комплексым чоҥен пытарыме. Республикым вуйлатыше паша дене У Торъял районыш миен. Тудо у комплексым ончен лектын. ФОК-ым 2011-ше ийыште чоҥаш тӱналме улмаш, но мучашлыме огыл. Пашам уэш кодшо ийлаште  гына тӱҥалме. Правительствын полшымыжо дене шонен пыштымым мучаш марте шуктымо. Тудо школ пелен верланен. Кум пачашан зданийыште спортзал, 25 метран бассейн, ӱстембал теннис да кучедалмаш зал- влак лийыт. Кадастр учётыш шогалтымеке, спорт объект Республикысе спорт сооружений- влак виктемыш кусаралтеш. Юрий Зайцев палемден: тиде пӱтынь районлан сай пӧлек. Лишыл жапыште верысе калык вучымо спорт объект дене пайдаланаш тӱҥалеш.
             Фото: Марий Элым вуйлатышын  администрацийжын увер дене пашам ыштыше пӧлкаже.