Марий Элысе аграрий- влак ик ийыште 711 единице ял озанлык техникым налыныт

          Марий Элысе аграрий- влак ик ийыште кугыжаныш полыш дене 711 единице ял озанлык техникым налыныт. Республикым вуйлатыше Юрий Зайцев Ял озанлык министерстве коллегийын заседанийыштыже лийын. Погынымаш агропромышленный комплексын 2023-шо ийысе паша лектышыжлан да 2024-ше ийлан задаче- влаклан пӧлеклалтын. Юрий Зайцев палемден: отрасль вияҥмаште сай лектышым ончыкта. Отрасльым вияҥдымаште ешартыш шӱкалтыш семын кушкылым ончымаште да шӧрым пуышо вольыкым ончымаште «кумылаҥдыше субсидийым» пуртымашым, республикым социал-экономик велым вияҥдыме индивидуал программым пеҥгыдемдымашым шотлыман. Полышым пуымылан кӧра ял озанлык пашаеҥ- влак материал-техник базым уэмдаш тӱналыныт. Кодшо ийын 711 технике ден оборудованийым кок миллиард наре теҥгелан налме. Ял озанлык производствым вияҥдаш кодшо ийын ик миллиард утла теҥге субсидийым колтымо, полышым 252 налшылан пуымо. Ял озанлык министр Андрей Кондратенкон мутшо почеш эртыше ийыште ял озанлык продукцийым 59 миллиард теҥгелан лукмо. Производствын индексше 101 процент лийын. 2023-шо ийыште саскан лектышыже дене республике Юл кундем округышто икымше верыш лектын, Российыште- кокымшо верыш, пареҥге лектыш дене округышто нылымше верым налын шога, Россий мучко 17-ше верыште улеш. АПК продукцийым йот элыш 54 миллиард теҥгелан колтымо. Тидыже 1,6 гана шукырак лийын. Мучашлан Марий Элым вуйлатыше ойыртемалтше пашаеҥ- влаклан наградым да тауштымашан серыш- влакым кучыктен.
             Фото: Марий Элым вуйлатышын  администрацийжын увер дене пашам ыштыше пӧлкаже.