Икымше февраль гыч троллейбусышто шагалрак тӱлен кошташ тӱҥалына

Икымше февраль гыч тӱшка транспортышто ик гана кайымылан да ик багаж верлан 19 теҥге лиеш. Тымарте 22 теҥге ыле. Тылзаш лимитдыме проездной билетын акшат вашталтеш. Тудо 1200 теҥгем огыл, а тӱжем теҥгем шогаш тӱҥалеш. Тидын нерген Марий Элым вуйлатыше Александр Евстифеевын Йошкар-Олан мэрже Евгений Маслов дене вашлиймаште ойлымо. Мэр увертарен: троллейбус транспортын калыклан кӱлешлыкшым шымлаш манын, тений январь гыч кайыме акым иземдаш банк карт дене тӱлымӧ акций эртаралтеш. Тудо Йошкар-Олаште да Медведево посёлкышто илыше калыклан келшен.  Тарифым иземдыме годым, троллейбус транспортын кӱлешлыкше кушмым шотыш налын, тариф политикым иземдыме могырыш вашталташ шонен пыштыме: ик гана кайымыланат, транспорт картыш оксам пыштыме годымат. Республикым вуйлатыше тыгак троллейбус транспорт предприятийын пашаже кузе виктаралтме нергенат йодын. Ола администраций мониторингым эре эртара,- каласен мэр. Те сайын паледа, предприятий панкрут радамыш лишемын ыле. Правительствын полшымо дене паша тӧрланен, манаш лиеш. Моско гыч кондымо троллейбус- влакат полышым пуэныт. Вашлиймаште республикым вуйлатыше пакча тургым лишемме нерген ушештарен. Сандене администрацийлан транспорт министерстве дене пассажирым шупшыктымо йодышым ончен лекташ кӱштен. Молан манаш гын, кок-кум тылзе гыч дачный маршрут- влак кӱлеш лийыт. Жап вашке эрта. Тиде пагытлан ямде лийман манын Александр Евстифеев.