Марий йоча- влак Москошто эртыше конкурсышто ойыртемалтыныт
Моско олаште «Ярмарка культур» калыкле тӱвыра да фольклорын кокымшо Тӱнямбал фестиваль-конкурсшо да «Музы России» йоча, самырык да кугыеҥ- влакын сцена да художественный усталыкыштын Россий кӱкшытан кокымшо фестиваль- конкурсышт эртен. «Шӱдыр» марий йоча ансамбль нине конкурслаште лауреат лийын. Киров областьысе Малмыж районын Кугу Кетек ялысе тӱвыра пӧртын куштышо йоча ансамбльже конкурсышко Киров вел марий- влакын куштымашыштым ямдылен. Кугу жюри йоча- влакын усталыкыштым пеҥгыдын аклен да «Калык куштымаш» номинацийыште кокымшо верым пуэн. Куштышо- влак тыгак икымше степенян лауреатын дипломжым, Сеҥышын кубокшым, шерге пӧлекым налыныт. Кажне участник медаль дене палемдалтын. Вуйлатышыже Ирина Кошкина «Калык йӱлам арлен кодымылан» диплом дене палемдалтын. Мероприятийым Иван Тургенев лӱмеш тӱвыра-социал тӱналтышым ыштыше Поро кумыл фонд Росийысе тӱвыра да туныктыш министерствылан, президентын полпредыштын полшымышт дене эртарен.