Ялыш туныкташ кайышылан- ик миллион теҥге
Тений гыч 2022-шо ий марте Марий Элыште да Российысе моло кундемлаште «Земский учитель» программе пашам ышташ тӱналеш. Тушто сеҥыше- влак паша шотышто ойпидышым ыштымеке, ик гана ик миллион теҥге компенсацийым налыт. Эн ончыч 10-шо январь гыч «Земский туныктышо» Российысе увер порталым почмо. Тудо туныктышо- влаклан яллаште да 50 тӱжем марте еҥ илыман олалаште вакансийым муаш полша. Кызыт тушто 45 паша верым ончыктымо. Туныктышо- влакын кыдалаш профессионал але кӱшыл шинчымашышт лийшаш, ийготышт 55 ий марте, ик ставкылан арняште 18 шагат деч шагал огыл жап пуалтеш, вич ий ик верыште ыштышаш. Марий Элыште конкурс почеш ойырен налмаш 10-шо январь гыч 15-ше апрель марте шуйна. 20-шо январьлан шотлымаште 83 еҥ шкеж нерген увертарен. Тиде программе яллаште да изи олалаште туныктышым ситараш полшышаш.