«Юнармий» толкыныш ныл тӱжемат пеле самырык еҥ ушнен
Республикыштына «Юнармий» военно- патриотизм толкыныш ныл тӱжемат пеле самырык еҥ ушнен. Мемнан республике деч сенатор Сергей Мартыновын паша дене Марий Элыш толмыж годым, правительство председательын икымше алмаштышыже Михаил Васютин дене вашлиймашыже эртыш. Михаил Зиновьевич тиде толкынын правительстве кӱкшытысӧ кураторжо улеш. Вашлиймашке «Юнармий» толкынын регионысо кураторжо Александр Мухачёвым да толкынын чолга еҥже- влакым ӱжмӧ ыле. Мутланымаш организацийын пашаже, толкынын республикыште вияҥмыже, сеҥымашыже нерген лийын. Сенатор дене вашлиймашке Козьмодемьянск гыч «Паллада» парус клубын юнга-юнармеецше, 11-ше классыште тунемше Дмитрий Матвеев, Йошкар-Оласе 11-ше лицей гыч Артём Васильев да 16-шо школын тунемшыже Ульяна Наумова толыныт. Васютинын мутшо почеш «Юнармий» толкыным 16-шо ийыште ыштыме да тудо утыр шарла. Кызыт тудын радамыш ныл тӱжемат пеле ӱдыр-рвезе ушнен. Школла пелен 36 кадет классым почмо, Марий Турек районышто ик школ пӱтынек юнармий школыш савырнен, 100 утла патриот клуб пашам ышта. Кодшо ийын 99 юнармеец оборона министерствын, МЧС-ын, МВД-н вузлашкыже тунемаш пурен.