Татарстаныште Юл эҥерын ончыкылыкшым каҥашыме
Эколог- влакын шонымышт почеш, лумын шагал вочмыжо Юл эҥерым куашемден кертеш. Юлын ончыкылыкшо нерген Татарстан республикысе экологий да пӱртӱс поянлык министерствыште ведомство- влак кокласе комиссийын заседанийыштыже ойлымо. Комиссийын пашаштыже Марий Элын пӱртӱс поянлык, экологий да йырым- йырысе средам аралыме шотышто министрже Алексей Киселёв участвоватлен. Палемдыме: лум Ӱлыл Юлыштат, Кӱшыл ужашыштат уке. Пытартыш 18 ийлан вӱдыжгын шапашыже эн изи улеш. Кодшо ийын вӱд шагаллан кӧра, Юл эҥерыште транспорт кӱрылтыш дене коштын, туризмлан да биологий ресурслан эҥгек лийын. Юл-Чолман бассейныште лумын шагал улмыжо лӱдыкшым луктеш. Энергетик- влак кузе лияш огыт пале: Куйбышев вӱдаралтышыште вӱдым шагалемдаш да Ӱлыл Юллан полшаш гын, кодшо ийысе ситуаций лийын кертеш. Вӱдым шагалемдаш огыл гын, Ӱлыл Юллан эҥгек лиеш. Куйбышев вӱдаралтыш воктене верланыше Юл кундемлан еҥышт водохранилищын вӱд поянлыкше дене пайдаланыме шотышто правилыш вашталтышым пурташ темленыт. Шошо вӱдшор годым, вӱдаралтыш гыч шуко вӱдым йоктарен колтыман огыл манын пунчалыныт. Тиде пунчалым вӱд поянлыкын федерал агентствышкыже ончаш колтат.