Ава капиталым сад участкыште пӧртым чоҥашат кучылташ лиеш

Кугыжаныш Думын депутатше- влак пленарный заседенийыште икымше лудмаште «Икшыван еш- влаклан ешартыш кугыжаныш полышым пуымо нерген» федерал законыш вашталтышым пуртымо нерген» законын проектшым ончен лектыныт. Законопроект почеш, ава капиталым сад участкыште пӧртым чоҥаш кучылташ лийшаш. Ондак илыме верым чоҥаш посна  ойырымо мланде кумдыкышто гына илыме пӧртым чоҥаш лиеш ыле. Депутат Светлана Солнцеван мутшо почеш, еш- влакын ава капиталым илыме верым саемдаш кучылт кертмышт пеш кӱлешан. Тиде законопроект икшыван еш- влаклан полышым пуымо шотышто Президентын Посланийже кышкарыште, ава капиталым кучылтмо йӧным эшеат кумдаҥда да сад участкыште илыме пӧртым чоҥаш але пужен ышташ йӧным пуа.