Звениговышто самырык биатлонист- влак таҥасеныт

             Самырык биатлонист- влак Звениговышто таҥасеныт. Звенигово оласе «Водник» стадионышто пневматик винтовко гыч лӱйкалыме биатлон дене «Луман снайпер» Республикын первенствыже эртен. Спортсмен- влак кум меҥгат 600 метрыш спринтер таҥасымаште тыршеныт. Тушто лӱйкалыме кок вер лийын. Пуля кӱлеш верыш логалын огыл гын, штраф семын ешарен 75 метрым куржман ыле. Таҥасымашке Звенигово, Красногорский да Шолеҥер гыч 50 утла спортсмен ушнен. 2007-ше-  2008-ше ийлаште шочшо рвезе- влак коклаште призан верым Артём Малов, Кирилл Веселов, Даниил Мухамедшин, ӱдыр- влак коклаште Кристина Фёдорова, Ирина Раскольникова, Екатерина Скворцова налыныт. Таҥасымашке тыгак 2011-ше ийыште шочшо да изирак биатлонист- влакат ушненыт. Сеҥыше да призёр- влаклан спорт-туризм министерствын медаль ден грамотыжым кучыктымо.
             Фото: «Единый Российын» сайтше.