Троллейбус- влаклан корно мучашысе у станцийым чоҥат

           Йошкар-Олаште кокымшо, шымше да 8-ше маршрутысо троллейбус- влаклан корно мучашысе у станцийым чоҥат. Мучаш у станций да рӱдӧ диспетчер пункт Тыныслык уремысе 15-ше номеран илыме пӧрт деч йӱдвелышкырак верланаш тӱналеш. Кызыт мучаш станций Лебедев уремысе 34 пӧртыштӧ, «Вишневый» чарналтышыште верлана. Троллейбус транспорт предприятийым вуйлатышын сомылжым шуктышо Александр Ляховын мутшо почеш, кызытсе станций изи да йӧндымӧ улеш. Адакшым корнын тиде ужашыже эре машина дене темше лиеш. Молан манаш гын, Озаҥ тракт гыч олашке пурымо вер улеш. У станцийын проектшым ыштыме годым чыла шотыш налме. Тудо кугурак да йӧнанрак лийшаш.
           Йошкар-Ола администрацийын фотожо.