Ынде Владимир ола марте кӱртньӧ корно дене миен шуаш лиеш
Йошкар-Ола гыч Владимир марте ынде кӱртньӧ корно дене миен шуаш лиеш. 6-шо март гыч Йошкар-Ола –Владимир маршрут дене плацкарт вагон кошташ тӱҥалын. Тыге ик поезд гыч весыш куснен шичде мучаш марте миен шуаш лиеш. Кужу жап Йошкар-Ола Москва фирменный поезд гына коштеш ыле. Ынде тудо апрель кыдал гыч кок пачашан вагон- влак дене пойдаралтеш. Декабрь мучаш гыч Угарман, Иваново, Ярославль гоч Санкт –Петербургыш вагон- влак коштыт. Теве кудымшо март гыч плацкарт вагон кок кечылан ик гана Йошкар-Ола ден Владимирым ушаш тӱҥалын. Йошкар-Ола гыч 23 шагатат 50 минутлан вагон кече коден кая, Владимирыш 18 шагатат 32 минутлан миен шуэш. Владимир гыч 9-ше март гыч кече коден 12 шагатлан тарвана, Ковров станцийыште 13 шагатлан Петербург групыш пурышо вагонла деке пижыкталтеш да Йошкар-Олаш 6 шагат эрдене толын шуэш.