Йӧратыме артист да поэт курымешлан каен

             Редакцийышкына ойган увер пурен. Таче Марий Элын калык, РСФСР-ын сулло артистше, МАССР Кугыжаныш премийын да Йыван Кырла лӱмеш театр премийын лауреатше, Марий Элын калык писательже Василий Регеж-Гороховын кужун черланен кийыме деч вара шӱмжӧ кырымым чарнен. Тудо 1937-ше ийын 27-ше августышто Куженер велысе Кугу Регеж ялеш шочын. 85 ияш лӱмгечыже марте вич тылзым гына илен ыш шукто. Тудо ГИТИС-ым тунем пытарен, 1965-ше ий годсек Шкетан лӱмеш калыкле драма театрыште пашам ыштен. Чапым налше актёр тыгак шкенжым кумдан палыме поэт, драматург, прозаик, кусарыше семын ончыктен. Тудын произведенийже- влак шӱм-чон гыч лекше улыт, шочмо калыкын илыш йӱлажым, тӱвыражым йӧраташ туныктат. Василий Михайлович Регеж-Горохов нерген шарнымаш калык шӱмеш курымешлан кодеш. Тудын дене чеверласымаш кумышто 11-ше мартыште 10 шагатлан Шкетан театрыште лиеш.
              Фото: С.Чавайн лӱмеш калыкле книгагудын сайтше.