Ийше Кристина Маслова Юл кундем округын первенствыштыже той медальым сеҥен налын
Йошкар-Ола гыч ийше Кристина Маслова Юл кундем округын первенствыштыже той медальым сеҥен налын. Ийме дене спорт школын тренерже Наталья Курицынан тунемшыже 400 метрыш комплексно иймаште кумшо верыш лектын. Пенза оласе «Сура» вӱд спорт полатыште Юл кундем федерал округын первенствыже эртен. Тушто Кристина Маслова 400 метр кужытышто кумшо, шӱдӧ да кок шӱдӧ метрыш иймаште нылымше лийын. Визымше верым Анастасия Крылова ден Фёдор Телицын налыныт. Тыгак шке кужытыштышт лу ончыл верыш Владимир Сандыков, Александра Макарова, Кирилл Немцев, Анна Басистая. Евгений Сурский, Анна Комина да Игнат Чернышов логалыныт. Тренер Ирина Рудалёван тунемшыже Владимир Сандыков Россий спорт мастерын норматившым шуктен. Таҥасымашыште чылаже 748 спортсмен кертмыжым ончыктен. Марий Эл гыч 39-ын лийыныт.