Марий Элым вуйлатыше республикым ӱшанлын вияҥдыме йодыш дене совещанийым эртарен

             Марий Элым вуйлатыше республикым ӱшанлын вияҥдыме йодыш дене совещанийым эртарен. У экономик ситуаций кышкарыште республикысе кучем чарыше санкцийлан вашке реагироватлышаш да тудын эҥгекшым иземдаш тыршышаш. Тидын нерген Марий Элым вуйлатыше Александр Евстифеев Правительствын еҥже- влак дене эртарыме совещанийыште увертарен. Палемдыме: тӱҥ социал-экономик корно дене паша икшырымын шукталтеш. Тудлан полшаш Александр Евстифеевын вуйлатымыже дене штабым ыштыме. Тиддеч посна экономикым вияҥдыме шотышто комиссий пашам ышта, системообразующий перечньышке пуртымо предприятий-влакын пашаштым арня еда мониторитлен шогат. 107 предприятийын финанс да экономик пашажым эскерыме почеш, нуно январьыште 12 миллиардат 600 миллион теҥге оксам ыштен налыныт. Кодшо ийысе тыгаяк жап деч тидыже 21 процентлан шукырак. Регион кӱкшытыштӧ промышленностьым да предпринимательствым вияҥдыме фондла гоч полыш пуалтеш. Тыгак агропромышленный комплекслан полыш умбакыже пуалтеш.
            Александр Евстифеев тӱҥ кочкыш сатулан, чоҥымо материаллан да топливылан акын могай улмыжым арня еда эскерыме йодышеш посна шогалын. Тудо каласен: кочкышлан акым эскерыман гына огыл, кевыт шӧрлыклам сату дене темымымат ончыман. Тыге иктаж-могай сатум, мутлан, сакырым опкынланен налмаш ок лий, акымат эскерен шогыман. Промышленность да торговля министр Станислав Крыловын мутшо почеш, январь гыч федерал ужалкалыше сеть- влак социал кӱлешан кочкыш сату- влаклан акым 10 процент деч шукылан кугемдаш огыл манын пунчалыныт. Сату списке тылзе еда рашемдалтеш. Палемдыме ешартыш ак тений идалык мучаш марте вашталтшаш огыл.
              Фото: Марий Элым вуйлатышын организаций да аналитик виктемже.