Йошкар-Оласе уремлам чаплын эрыкташ тӱҥалыт

                   Йошкар-Оласе уремлаште у вакууман ӱштын эрыктыше технике пашам ышташ тӱҥалеш. Оласе уремлам чаплын эрыкташ тыгай техникым налаш 15 миллион утла теҥгем колтымо лиеш. Окса правительствын резерв фондшо гыч ойыралтеш. Тидын шотышто распоряженийым республикым вуйлатыше Александр Евстифеев пеҥгыдемден. У техникым налме нерген Республикым вуйлатышын оласе объектлам ончен лекмыж деч вара эртарыме пашаче совещанийыште пале лийын. Александр Евстифеев ола мэрлан шижтарен: тений уремлам эрыктыме шотышто паша начар шукталтеш, тидын нерген оласе калыкат ойла. Евгений Масловын мутшо почеш, теле гоч оласе урем корнылаш 14 тӱжем тонн утла ошма да шинчал вартышым шавыме. Специальный техникын шагал улмыжлан кӧра, эше чыла уремым эрыктен шуктымо огыл. Уремлам олмыкташ асфальто-бетон заводын ямде улмыж нерген объектыштак ойлымо. Олмыктымо паша кажне ийын шукталтеш. Тений проект почеш 9 урем иканаште олмыкталтеш. Тушко тротуарат, газонат, йӱр вуд йогымо канализацият пурат. Эше кок уремым ешарен олмыктыман. Сандене завод ончылно шогышо задаче раш. Александр Евстифеев оласе службын корно пашалан сайын ямдылалтмыжым палемден. Предприятий 100 процентлан ямде, кучылтшаш материалын шапашыже ситыше.
Фото:  http://mari-el.gov.ru/

Прошлые выпуски