Республикыштына коронавирус дене черланымашын шагалеммыжым палемдат

                  Республикыштына коронавирус дене черланымашын шагалеммыжым палемдат. Тидын нерген теҥгече Оперативный штабын черетан заседанийыштыже ойлымо. Тудым Марий Элым вуйлатыше Александр Евстифеев эртарен. Роспотребнадзор виктемым вуйлатыше Светлана Булатова палемден: суткасе показатель Российысе деч кок пачашат пелылан шагалрак, арня мучкылан иктат пелылан иземын. Черым пеҥгыдемдыман еҥ- влакым эмлыме верыш пыштымаш шагалемын. Февраль дене таҥастарымаште мартыште 33 процентлан шагаларк пыштыме. Республикыште ик верыште тӱшкан черланымашым рашемдыме огыл. Йот эл гыч пӧртылшӧ- влакым терген шогат. Чылаже 7 тӱжем утла еҥ толын. Нунын кокла гыч 21 еҥын чержым пеҥгыдемден ончыктымо. Апрельыште Турций гыч 3 еҥ, Египет гыч 1 еҥ черланен толын. Ончылно эше черланыме шотышто лӱдыкшӧ жап уло. Тиде- Кугече пайрем, Сеҥымаш парад, сад-пакча тургым, йоча лагерь, отпуск тӱҥалме пагыт. Сандене лӱдыкшым иземден толман,- каласен Светлана Булатова. 
                   Тазалыкаралтыш министр Марина Панькован каласымыж почеш, ковид черан- влаклан 7 медицина организацийыште 430 койко уло. Тушто 273 еҥ эмлалтеш. Тушечын 60 еҥже нелын черланыше, 135 еҥ кислород полышым налеш, ИВЛ дене 11 пациент пайдалана. Теҥгечысе кечылан республикыш 50 тӱжем утла дозо вакциным кондымо. 38 тӱжем утла еҥ прививкым ыштыктен, 21 тӱжемже тичмаш курсым эртен. Сад-пкча тургым тӱналме дене Республикым вуйлатыше Александр Евстифеев садовод- влакым вакцинироватлыме нергенат ойлен. Сад товариществылашке  миен, прививкым ыштыме йӧным ончаш кӱштен.