Марий Элыште шӱк- куштырам ойыркалыше кум комплексым чоҥаш палемдыме
Марий Элыште шӱк- куштырам ойыркалыше кум комплексым чоҥымо шотышто инвестиций проектым шыҥдараш палемдыме. Марий Элым вуйлатыше Александр Евстифеев пеҥгыде коммунал шӱк-куштыра дене пашам ыштымаште тарифым виктарыме йодыш дене совещанийыште участвоватлен. Тудым видеоконференцкыл йӧн дене ГосСоветын «Экологий да пӱртӱс поянлык» корно дене комиссийжым вуйлатыше, Угарман областьын губернаторжо Глеб Никитин эртарен. Погынышо- влак шӱк- куштырам погаш контейнерым налме да кучымо шотышто роскотым учётыш налмаште чаракым кораҥдыме, инвестиций проектым шыҥдарыме годым коммунал полышлан калыклан оксам шагаларк тӱлымӧ йӧным уэмдыме да моло пӱсын шогышо йодыш- влакым каҥашыме. Кызыт Марий Элыште шӱк –куштыра дене пашам ыштымылан «Благоустройство» ушем региональный оператор семын мутым куча. Пеҥгыдемдыме тариф талукаш кокла инфляций деч изирак, Юл кундемыште кокла кӱкшытыштӧ улеш. Республикын правительствыж ден «Чистый город» ушем коклаште шӱк-куштырам ойыркалыме кум комплексым Йошкар-Олаште, Волжск да Шернур район кундемыште чоҥымо шотышто инвестиций проектым шыҥдарыме годым вашкыл нерген соглашенийым пеҥгыдемдыме. Тудын дене келшышын нине комплексым инвестор заём окса кӱшеш чоҥаш шона.