Йошкар-Олан кечынже концертым эртараш да пайрем салютым ышташ палемдыме

                   Йошкар-Олан кечынже чыла лӱдыкшыдымылык мерым шуктен, концертым эртараш да пайрем салютым ышташ палемдыме. Марий Элым вуйлатышын кӱштымыж почеш пайрем мероприятий- влакым эртараш лийме шотышто йодмашым Роспотребнадзорын республикысе виктемышкыже колтымо лиеш. Тидын нерген Йошкар-Олан кечыжым палемдыме да Яков Эшпай лӱмеш Марий Кугыжаныш филармонийым почмо йодыш дене совещанийым эртарыме. Олан кечыже - калыклан кугу пайрем. Тудо филармонийым почмо жап дене келшен толеш. Но пайремым кумдан эртараш ок лий. Мутлан, Пӱтынь марий йоча хорым ӱжын огына керт. Молан манаш гын, черланыме лӱдыкшӧ кугу улеш. Но театр ден концерт зал- влаклан пашам ышташ палемдыме мера дене келшышын пайремым эртараш шонена,- каласен Александр Евстифеев. Правительстве председательын икымше алмаштышыже Михаил Васютин тидым ешарен: 13-шо августышто филармонийым почаш палемдыме. Залын пелыжым гына айлен кертына- тиде 200 наре еҥ. Почмашке Российын тӱвыра министржымат ӱжынна. Олан кечыжым 14-ше августышто виш верыште эртараш кӱлеш манын кутырышна. Чарла Кремль кумдык темлалтеш. Тушко вич тӱжемеҥ пура гын, тӱжемат 700-жым вераҥден кертына,- манын тудо. Марий Элым вуйлатыше олан мэрже Евгений Маслов деч пайрем тулсавыш нерген йодын. Мэр салютым 14-ше августысо программыш пуртымо. Тудо виш, чара верыште лиеш. Сандене чарак уке, манын. Александр Евстифеев Роспотребнадзор виктем гыч вашмутым налмеке, пеҥгыде решенийым ыштена манын иктешлен.