Авиалесоохраным технике дене пойдарат

                Республикысе Авиалесоохраным чодыраште тулым йӧртымӧ технике дене пойдарат. Тиде пашалан оксам «Экологий» калыкле проект кышкарыште ойырат. Июльышто республикылан 524  тӱжем теҥгем пуымо. А тений чылаже федерал бюджет гыч технике ден оборудованийым налаш 34 миллионат 600 тӱжем теҥге оксам колтымо. Пӱртӱс поянлык министерстве тиде окса дене индеш техникым да 10 оборудованийым налаш кугыжаныш контрактым пеҥгыдемден, ик техникылан ойпидышым кылдыме. Июль мучашыште республикыш прицепан кум трактор бочко да вӱдлан 10 резервуар толын. Августышто моло техникым кондышаш улыт: тралан кок тягач, кок грузовой машина, экскаватор, автомобиль да мотовездеход лийыт.
                 Пӱртӱс поянлык министерствын фотожо.