Йоча лагерьыш куанен коштыт

Семеновко селасе 21-ше номеран школ пелен "Закрутим планету вместе" лӱман йоча лагерь почылтын. Тематике сынан сменыште латкок вожатый пашам ышта. Нуно йоча-влаклан онай да шкешотан модыш ден конкурсым эртарат, тунемше-влакым тӱрлӧ йотэл да континент-влак дене палымым ыштат.Чылаже каныме лагерьыште - тӱҥалтыш классыште тунемше 150 йоча. Нуным куд отрядыш погеныт. Кок арня жапыште йоча-влак тоштерышке, театрышке, Йошкар-Оласе тӱвыра полатлашке миен коштыт. Смене мучашыште концертым ямдылат. Тыгак школ пелен эше «Эко патруль» лӱман экологий да краеведений сынан смене пашам ышта. Визымше да шымше класслаште тунемше коло вич йоча республикынан пӱртӱсшым шымлаш да перегаш тунемыт.