Волжскышто 2 поликлиникым ачалаш палемдыме

Волжскышто кок поликлиникым капитально олмыкташ палемдыме. Кугыжаныш да Марий Эл правительствын полшымышт дене пытартыш кум-ныл ий жапыште олаште медицине тӧнеж-влак ятырлан сай могырышко вашталтыныт. Мутлан, йоча поликлиникым, йоча-влаклан стационарым тӧрленыт. Кызыт рӱдӧ эмлымверыште ачалыме паша тӱҥалын. Зданийым 1968-ше ийыштак чоҥымо. Сандене тудым уэмдыме паша кӱжгӧ. Тушто чыла инженерно-технический коммуникацийым, сантехникым, окна ден омсам вашталтышаш улыт. Тыгак кӱварым, тувырашым, пырдыжым тӧрлаш да моло пашам шукташ палемдыме. Районысо рӱдӧ эмлымверым ачалымаш эше 2017-ше ийыштак тӱҥалын. Тудо «Кугыеҥ-шамычлан поликлинке-влакын материально-технический базыштым у стандартлан келыштарымаш» программышке пурен. А теве Волжскысо 2-шо номеран поликлиника икымше медико-санитарный полышым пуышо медицина тӧнеж-влакым уэмдыме шотышто  программышке пурен. Тушто ачалыме пашам 2022-шо ийыште тӱҥалаш палемдыме.