Самырык еш

Йошкар-Оласе историй тоштерыште «Идалыкын ешыже» республикысе конкурсын муниципал этапыштыже сеҥышыш лекше-влакым саламлыме погынымаш эртен.«Самырык еш» номинцийыште Кудрявцевмыт еш сеҥышыш лектын. Вате-марий Виталий ден Светлана коктынат «Марий Эл» кугыжаныш ансамбльын солистше-влак улыт. «Еш – йӱлам аралыше» номинацийыште Шестаковмыт еш сеҥен. Шуко шочшан еш-влак коклаште Смирновмыт ешым палемденыт. Тушто 6 икшыве кушкеш. А теве «Шӧртньӧ еш» номинацийыште Кравецмыт ойыртемалтын. Сеҥыше-влаклан диплом ден пӧлекым Йошкар-Ола администрацийын тӱвыра пӧлкажым вуйлатыше Надежда Логинова кучыктен да ончыкыжымат моло еш-влаклан пример лийын кодаш тыланен.