Волжск олаште йоча площадкым ыштыме, Юриныште спорт площадке лиеш

                  Депутат- влак Волжск оласе калыкым проект почеш пашашке ушнаш ӱжыныт. Пырля тыршымын лектышыже семын кок кудывечыште йоча- влаклан модмо площадкым ыштыме. Гагарин уремысе 10-шо, 10-шо А да Б пӧрт кудывечылаште верысе инициативылан полышым пуымо шотышто программе почеш йоча площадкым тӱрыс ыштен шуктымо. Тиде пашалан республикын бюджетше гыч 480 тӱжем теҥгем ойырымо. Мер комиссийын еҥже- влак площадкыште лийыныт да пашам приниматлыме шотышто актым пеҥгыдемденыт. Йоча площадкым ыштыме проект дене депутат- влак Алексей Сташкевич ден Рифат Закирьяев пашам ыштеныт. Нуно верысе калыкым ушнаш ӱжыныт да нуныжо уло кумылын пашаш пижыныт. Проектым шыҥдараш тыгак Марий целлюлоз-кагаз комбинат полшен. Верысе инициативылан полышым пуымо программе почеш тений эше Киров уремысе 4-ше пӧрт кудывечыште площадкым вераҥдыме лиеш.
           А Юрино районышто йоча спорт площадке мер кӱлешан проект конкурслан кӧра ышталтеш. Рӱдӧ посёлкышто лишыл жапыште йоча- влак спорт площадкыште тазалыкым пеҥгыдемден кертыт. Кодшо кечылаште погынымаш эртен. Тушто модын налме проектым умбакыже кузе шыҥдарыме  нерген каҥашыме.