Волжск ола гыч 14 ияш кучедалше кумшо гана ПФО-н первенствыштыже сеҥышыш лектын

           Волжск ола гыч 14 ияш кучедалше  Владислав Бырля ынде кумшо гана Юл кундем округын первенствыштыже сеҥышыш лектын. Таҥасымаш Киров олаште эртен. Российын сулло тренерже Александр Серяковын тунемшыже 18 ияш марте рвезе- влак коклаште греко-рим кучедалмаш дене Юл кундем округын первенствыштыже икымше верым сеҥен налын. Самырык спортсмен 55 килограмм марте нелытан- влак коклаште кучедалын да чыла вич вашлиймашыштыжат сеҥыше лийын. Пелфиналыште Бырля элын призёржо Оренбург область гыч Радиф Жоробаевым, финалыште Ульяновск область гыч Арслан Абакаровым сеҥен. Тиде нелыт категорийыште татамишке чылаже 33 спортсмен лектын. Тыге Бырля ПФО-н первенствыжым кумшо гана сеҥен. Тиддеч посна Российын первенствыштыже кок гана призёр, кодшо ийын Уфаште кумшо, 2019-ше ийыште Владимирыште кокымшо лийын ыле. Тений мартыште Владислав Российын первенствыштыже Башкортостаныште вийжым ончыкта.
             Фото: "Марийская правда".