Рӱдӧ оласе тӱшка транспорт кугун вашталтеш

           Рӱдӧ оласе калыкым тӱшка транспортын кугун вашталтмыже вуча. Транспорт сетьым тений шошым вашталташ тӱҥалыт. Троллейбус маршрут- влак корныштым икмыняр вашталтат да маршрутко да автобус дене ик корно дене кудалышташ огыт тӱҥал. Кодшо кеҥежым правительствын лукмо пунчалже почеш, апрель гыч кызытсе маршрут- влак олмеш уым колтат. Ола мучко 11 автобус  да 11 троллейбус маршрут- влак лийыт. Мутлан икымше, визымше, кудымшо, 11-ше маршрут- влак пеш огыт вашталт. Кокымшо троллейбус Звёздный микрорайон марте шуйна, кумшо троллейбус Опытное поле марте кая, 8-ше троллейбус Вишнёвый урем деч Медведево марте коштеш. 15-ше номеран маршрут Шыл комбинат ден Фестивальный микрорайон марте коштшаш, но эше линийже уке.  Маршрутко- влакын корнышт тӱвыт вашталтеш да у маршрут- влак ешаралтыт. Икмыняр пригород автобус лиеш. Рашырак ола администрацийын сайтыштыже палыме лияш лиеш.