Йошкар-Ола администрацийыште Марий паркым уэш почаш темленыт
Йошкар-Ола администрацийыште Марий паркым уэш почаш темленыт. Тушто «Йошкар-Оласе марий погынымаш» консультативный мер совет эртен. Погынымашыште марий калыкын йӱлажым арален кодымо шонымашым шотыш налын ола кумдыкым тӱзландарыме йодыш- влакым каҥашыме. Правительстве председательын икымше алмаштышыже Михаил Васютин палемден: Йошкар-Олам Российысе субъектын рӱдӧ оласже семын гына ончыман огыл, а марий автономийын рӱдӧ олаже семын аклыман. Тидын годым тыгай радам лийшаш: йодышым шындымаш, решенийым кычалмаш, илышыш шыҥдарымаште калыкын шонымашыжым кучылтмаш. Каҥашыме ик йодышыжо ожно Чарла кремль олмышто верланыше Марий паркым уэш ыштымаш. Тудлан Сомбатхей микрорайонышто Тазалык аллей деч кӱшнырак верым палемдыме. Михаил Васютинын мутшо почеш тиде марий калык дене кылдалтше виш кумдык лийшаш. Марий парк шке шотан сцена лияш сӧра. Тушто пайрем, калык йӱла эртаралтеш, марий сем, почеламут йоҥга. «Йӧнан оласе кумдыкым ыштымаш» федерал проект лач оласе кумдык- влакым вияҥдаш у шӱкалтышым ыштышаш. Тидын годым тӱзландарышаш кумдыкым лач калык ойырен налшаш. 19-ше январь гыч 2023-шо ийлан тӱзландарышаш кумдык- влакым ойырен налме шоышто йӱклымаш кая. Ойырен налшаш кумдык 100 деч шагал огыл йӱкым погышаш. «Йошкар-Оласе марий погынымаш» мер советын активше Марий парк кундемым тӱзландараш темлаш ямде улмыжым ончыктен. Тыгай шонымаш дене келшыше- влак 18-ше февраль марте ола администрацийыш темлымашым колтен кертыт.
