Изи Какшан гоч эше ик кӱвар ямде лиеш

               Киров урем гыч Строитель урем марте шуйнышо магистральыште Изи Какшан эҥер гоч пыштыме кӱвар дене тений кеҥежым кудал эрташ лиеш. Магистарль уремым чоҥымо икымше йыжыҥжым 70 наре процентлан шуктымо. Подрядчик ӱшандарен ойлен: Ленин проспект деч Луначарский урем марте ужашым тений кеҥежым почмо лиеш. Чоҥымашын икымше йыжыҥже пӱтынек тений шыжылан ямде лийшаш. Кызыт у кӱварын ужашыже- влак ушалтыт. Пашан кузе кайымыжым Марий Элым вуйлатыше Александр Евстифеев аклен. Правительстве председательын икымше алмаштышыже Александр Сальниковын мутшо почеш, ятыр позиций дене паша график деч ончыч шукталтеш. Кызыт тыгай задаче шога: федерал корно агентстве дене 2023-шо ийысе бюджет лимитым 2022-шо ийыш кусараш да магистраль уремын икымше черетшым чоҥен пытараш ешартыш оксам ойырымо йодышым виктараш кӱлеш. Тиде йодыш февральыште Росавтодорышто ончалтеш. Пашан кокымшо йыжыҥже тений тӱҥалшаш да 2025-ше ийыште мучашлалтшаш.
                 Паша дене коштмо жапыште Марий Элым вуйлатыше тыгак оласе кӱвар- влакым олмыктымо планым каҥашен. Эн ончычак тудо Ленин проспектысе кӱварым олмыктымо паша нерген умылкален. Транспорт да корно озанлык министр ӱшандарен: кӱвар тений кеҥежым олмыкталтшаш. Тидымат ешарен. Тений  тыгак Царьград проспектыште кӱварым олмыкташ тӱналаш палемдыме. Марий Элым вуйлатыше ешарен: автомобиль корнылам олмыктымо, транспорт инфраструктура дене кылдалтше йодышлам комплексно решатлаш кӱлеш. Тиде шукталтеш гын, транспорт проблеме кораҥдалтшаш. Подрядчик графикышке пурен - тидыже куандара,- каласен Александр Евстифеев.