Марий Эл гыч шинчалтыме ковыштам Киров кундемысе исправительный тӧнежлашке колташ тӱналыт

            Марий Эл гыч шинчалтыме ковыштам Киров кундемысе исправительный тӧнежлашке колташ тӱналыт. Шымше номеран колоний-поселенийын специализированный участкыштыже 80 тонн ковыштам ямдылышаш улыт. Тушечын 20 тоннжо Марий Элысе режиман тӧнеж- влаклан, 60 тоннжо Киров кундемысе колонийлашке колталтеш. Кугыжаныш контрактын тӱшка акше ныл миллионат 775 тӱжем теҥгеш шуын. Чыла пашам икымше апрель марте ыштен шуктышаш улыт. Ушештарена: саскам перерабатыватлыме цех кодшо ийын шошым почылтын ыле. Ик тургымышто колоний лу тӱжем банке ковыштам, киярым, шоганым, кешырым да томатым мариноватлен, консервироватлыме борщым ямдылен. Чыла сату системе кӧргысӧ кӱлешлыклан ышталтын. Телым тӱҥ шотышто ковыштам шопыктарат. Тидлан саскам тыгыдемдыше оборудований ятыр ий дене кучылталтеш. Тений 220 литран бочко- влак кӱлеш лийыныт. Тудым Самара гыч кондат, а ковыштам верысе аграрий- влак ситарат. 80 тонн ямде ковыштам ышташ 88 тонн свежа ковышта ден тоннат пеле шинчал кӱлеш. Чыла пашам петырымаште шинчыше ныл еҥ шукта. Нуно кечеш 17-20 бочко ковыштам ямдылат.
             Фото:МариМедиа.