У автовокзал шыжым ямде лийшаш

               Йошкар-Олаште у автовокзал тений шыжым пашам ышташ тӱҥалшаш. Объектыште паша чолган шукталтеш. Тидым республикым вуйлатыше Александр Евстифеев чоҥымо площадкыш миен, шкеак ужын. Автовокзалым чоҥаш тений июньышто тӱҥалме. Таче кечылан свайым кырыме, кӱварлан бетон шартышым ыштыме. Иканаштак йӱр вӱд йогымо канализаций ышталтеш. Вокзалын вучымо залышкыже иканаште 100 еҥ пура, суткаште тудо кок тӱжем еҥым колтен кертеш. Фасадше да сӧрастарымашыже марий тӱрым ушештара. Тиде кумдыкышто павильонан 10 перрон, автобус шогымо 40 вер да шке машинам шогалташ 26 вер ышталтеш. Тыгай проектым округысо икмыняр кундемыште кучылтмо. Паша кызыт сайын кая. Ноябрь марте чыла ыштен шукталтеш манын ӱшанем, - каласен Глава. Тудо тыгак ешарен: автобус паркым уэмдаш, районлаште автовокзал- влакым чоҥаш шонымаш уло.
Фото: vnd12.ru