Суд пристав-влак рейдым эртарат

Марий Элыште кок ий почела «Корно пристав» комплекс пашам ышта. Тудын полшымыжо дене суд пристав-влак автомашинан озажым да парымже уло-укем рашемдат. Тидлан лач суд пристав службын базыштыже транспорт номерым тергат. Кодшо арнян суд пристав-шамыч ГИБДД пашаеҥ-влак дене пырля Волжскышко рейд дене лектыныт. Тудын годым рашемын: 300 наре автотранспортын озаже - парыман радымыште. Суд пристав-влак тудым мобильный терминал полшымо дене верыштак тӱлаш темленыт. Тыге 130 тӱжем утла теҥге погеныт. А теве кӧ тидым ышташ тореш лийын, машинаштым арестоватленыт. Тыгайже 17 еҥ лийын. Рейд-влак республика районлаште умбакыже шуйнат.