Шымше номеран колоний-поселенийыште свежа саскам ямдылыше цех почылтын

                   Светлый посёлкышто верланыше шымше номеран колоний-поселенийыште свежа саскам ямдылыше цех почылтын. Тушто мариноватлыме ковыштам, щи ден борщлан заправкым, мариноватлыме шоганым ыштен ямдылат. Федерал целевой программылан кӧра тӧнежлан ик миллионат 350 тӱжем теҥге оксам кок автоклавым налаш ойырымо. Тиддеч посна 600 утла тӱжемым шолтышаш котёлым, парогенераторым, стерилизаторым, петырыме машинкам налаш, видеокамерым вераҥдаш пуымо. У производствым шыҥдарымашым республикысе ял озанлык министерстват сайлан шотлен. Молан манаш гын, кызыт свежа саскам консервироватлыше ик предприятият уке. У участкын тӱрлӧ сатум лукташ кӱлеш декларацийже уло. Икымше контарктым кум литран 800 банке консервироватлыме ковышта ден шоганым ышташ пеҥгыдемдыме. Ямде сату республикысе исправительный тӧнеж- влаклан колталтеш. Ончыкыжым тудым общепитыш, социал да медицина тӧнежлашкат колташ шонымаш уло. Кызыт тудо ик сменыште пел тонн ямде сатум луктын кертеш, а талукышто 88 тонн саскам консервироватлаш планым ыштат.