Козьмодемьянск олаште «Чап Обелискым» олмыктат

                    Козьмодемьянск олаште «Чап Обелискым» капитально олмыкташ палемдыме. Мемориалым 45 ий ончыч Пугачёв курыкышто вераҥдыме. Тудо кугу сареш вуйым пыштыше земляк- влакым ушештара, но ынде кугу ачалымашым вуча. Лач тыгай темлымаш дене кодшо ийын олан администрацийышкыже верысе калык лектын. Администраций олмыктымо проектым ямдылен да тудым тенийлан верысе инициативылан полышым пуымо республикысе программыш пуртымо. Проектым илышыш шыҥдараш кок миллион наре теҥге оксам ойырымо. Но тиде шийвундо мемориал комплексын тӱҥ монументшым олмыкташ ок сите. Сандене проектым кум йыжыҥлан шелаш лийме. Тений стелым гына капитально олымктат. Тошто чапкӱжӧ кораҥдалтеш. Тудын олмеш 23 метр кӱкшытан у стелым ыштат. Тудын воктене ныл прожекторым вераҥдат. Ынде вес ийлан программыш  кокымшо черет мероприятийым пурташ йӧн ончалтеш. Тушто Курымашлык тул комплексым, воктелсе кумдыкым  олмыкташ шонат.