Учимсолаште ФАП-ым чоҥаш тӱҥалме
Учимсолаште ФАП-ым чоҥаш тӱҥалме. Волжский районысо тиде ялыште фельдшер пунктым перивчный звеном уэмдыме программе кышкарыште чоҥалтеш. Тымарте ФАП тошто школышто верланен ыле. Школым петырыме. А Учимсола, Кокласола, Ӱлылсола, Курыктӱр, Шӱргыял- вич ялысе калык медицина полыш деч посна ынже код манын, у ФАП-ым чоҥаш кутырен келшыме. Калыклан полышым заведующий Лидия Степанова пуа. Тудо 1991-ше ий годсек пашам ышта, а медшӱжар Раисия Фёдорован стажше -20 ий утла. Модернизаций программе кышкарыште республикыштына 860 миллион теҥгелан шым объектым нӧлташ палемдыме. Учимсола деч посна эше Марий Турек велысе Тат-Китняште, Звенигово ден Медведево районлаште кум врач амбулаторий, Юриныште да Йошкар-Олаште поликлинике- влак. Модернизаций программылан республикыш кок миллиард утле теҥге оксам колтымо лиеш.