22-шо июнь- ойган кече
Республикысе калык- шарна. 80 ий ончыч 1941-ше ий 22-шо июньышто фашист Германий Совет Ушемыш керылт пурен. Тыге элнан историйыштыже шучко сар тӱҥалын. Кызыт тудын кугытшым туртыкташ, совет калыкын подвигшым иземдаш тыршат. Но цифр ондалаш ок пу. Миллион дене салтак шке вуйжым сӧй пасуэш пыштен. Марий Эл гыч гына 130 тӱжем утла еҥ фронтыш каен. Нунын кокла гыч 53 еҥлан Совет Ушемын Геройжо кӱкшӧ лӱмым пуымо, 15-шылын ӱмыр лугыч лиймеке. Сарыш кайыше- влак кокла гыч пелыж деч шагалже мӧҥгӧ пӧртылын. Тиддеч посна ятыр еҥже оккупаций кундемыште казнитлалтын, черланен да шужен коленыт. Чыла тидым шарнаш гына кодеш. Лач тидланак «Без срока давности» Россий кӱкшытан проектым ыштыме. Тудо профессионал историк ден Российын патриотшо- влакым ушен шога. Тений республикыште тыгай лӱм дене архив документ- влакым ончыктышо выставкым эртарыме.