Марьино гыч Юриныш корным кок ийлан ондак ыштат.

                        Марьино гыч Юриныш корным кок ийлан ондак ыштат. Марий Элым вуйлатыше Александр Евстифеев Юрино посёлко гыч Сумки селаш паромым колташ палемдыме верыш намийыше корным чоҥымо шотышто совещанийым эртарен. Тӱҥ шотышто Марьино гыч Юриныш автомобиль корным олмыктымо йодыш каҥашалтын. Глава палемден: тений идалык тӱҥалтышыште Юрино районым вияҥдыме шотышто совещанийыште мутланышна. Тушто корно йодыш тарваталтын: паром переправым чоҥымаш, Юлын вес серыштыже тыгыде кӱан корным ыштымаш. Кузе тиде паша шукталтеш? Транспорт да корно озанлык министр Александр Герасименкон мутшо почеш, кызыт Марьино-Юрино корно чоҥалтеш. Тудын кужытшо 16 меҥге утла. Пашан акше 173 миллион теҥге. Тенийлан палемдыме пашам сентябрьыште мучашлаш палемдыме ыле, но тудо ондакырак шукталтеш, 5-ше июль марте. 2022-шо ийлан палемдыме объект- влак шотышто: корнын куд меҥге кужытшо 5-7-ше июльлан ямде лийшаш. Тыге, 17 меҥге наре кужыт корно тений ыштен шукталтшаш. Федерал корнын ужашыштыже 2023-шо 2024-ше ийысе паша шотыштат  жап вашталтеш. Тений идалык мучаш марте конкурс процедура мучашлалтшаш да вес ийын корнын пӱтынь кужытыштыжо  паша мучашлалтшаш. 
Министр тидымат палемден: Курык марий районысо Сумки села деке намийыше корным проектироватлаш оксам ойырымо. Юрино район администрацийым вуйлатыше Марина Шихова палемден: Кочетов уремым олмыкташ 9 миллион утла теҥге оксам ойырымо. Лишыл жапыште посёлкысо ик рӱдо уремыште олмыктымо паша тӱҥалеш. Александр Евстифеев пашам луштарыде, жапыштыже шуктен шогаш задачым шынден.