Шуко пачеран пӧртлаште паша кая
Марий Элым вуйлатыше Александр Евстифеев Россий президентын Юл кундем федерал округышто полномочный представительже Игорь Комаровын эртарыме видеоконференцийышкыже ушнен. Тушто мемнан федерал округышто шуко пачеран пӧртлаште тӱшка погым капитально олмыктымо пашам шуктымо нерген йодыш каҥашалтын. Игорь Комаровын мутшо почеш, тиде тема моткоч пӱсӧ. Вет капремонтлан жапыштыже тӱлен шогышо еҥ-влак ачалыме пашамат жапыштыже да сай качестваным ужнешт. 2014-ше ий гыч округышто 45 тӱжем утла шуко пачеран пӧртышто олмыктымо паша шукталтын. Марий Элыште ты программышке 4 тӱжем наре шуко пачеран пӧрт пура. Тиде ийын тӱшка погым 112 пӧртышто ачалаш палемдыме. Тышкак 53 лифт пура.