Шочмо палым терге

Республикысе кожно-венерологический диспансЕрын специалистше-влак Патриарший площадьыште эртарыме акцийыштым иктешленыт. Ныл кече жапыште нуно тӱжем утла еҥын коваштыжым тергеныт, шочмо палыштым шымленыт. Тыге 48 еҥым Онкологий диспансЕрышке кумдарак тергымашке колтеныт. Кум айдемын меланомым – коваште ракым – верештыныт. Икымше гана шочмо пале-влакым уремыште тергымаш кодшо ийын эртен. Тыгай йӧным пандемийлан кӧра илышыш пурташ логалын. Тунам моткоч шуко еҥ тергалташ толын. Сандене теният ты акцийым умбакыже шуйымо.