Шошо да паша пайрем вашеш Республике кӱкшытан «Пашан еҥже- влак» профушем конкурсын участникше- влакым саламлыме

           Шошо да паша пайрем вашеш Республике кӱкшытан «Пашан еҥже- влак» профушем конкурсын участникше- влакым наградитлыме  торжественный церемоний лийын. Тенийлан увертарыме Ешын талукыштыжо Республикым вуйлатыше Юрий Зайцев «Марий Элын эн сай паша династийже» отличий палым пеҥгыдемдыме нерген решенийым луктын. Республикыште икымше гана кӱкшӧ профессионал мастарлыклан да еш йӱлам арален кодымылан республикысе эн сай паша династий- влакым наградитлыме. Марий Элым вуйлатышын лӱмжӧ дене погынышо- влакым Правительстве вуйлатышын икымше алмаштышыже Михаил Васютин саламлен. Тений конкурсыш 26 лауреат ушнен. Нуно Йошкар-Ола, Шернур, Марий Турек, Куженер, Волжский, Морко, Килемар, Оршанке, Юрино да Звенигово районла гыч улыт. Отличий пале идалыкыште ик гана паша династийын эн кугу ийготан еҥжылан пуалтеш. Династийын кажне представительже пашам ыштыме кажне тичмаш идалыкшылан тӱжем теҥге гыч окса пӧлекым налеш. Отличий пале дене пырля диплом пуалтеш. Тудо династийын самырык тукымжылан куснен шога да еш йулам аралаш да умбакыже шуяш йӧным ышта. Михаил Васютин 8 паша династийлан «За преемственность поколений» номинацийыште Марий Элым вуйлатышын тауштымашан серышыжым кучыктен.
             Фото: Марий Элым вуйлатышын  администрацийжын увер дене пашам ыштыше пӧлкаже.