Кеҥеж тургымышто Марий Элысе лагерьлаште 30 тӱжем утла йоча каналта

             Кеҥеж тургымышто Марий Элысе лагерьлаште 30 тӱжем утла йоча каналта. Марий Элым вуйлатыше Юрий Зайцев видеоконференций режим дене Россий Правительстве вуйлатышын алмаштышыже Татьяна Голикован эртарыме совещанийыште участвоватлен. Повесткыште регион- влакын кеҥежымсе тазалыкым пеҥгыдемдыме кампанийлан ямде улмышт шотышто йодыш лийын. Российын вице-премьерже палемден: тений тӱшка каныш дене авалтыме йоча- влакын чотыштым кугемдаш палемдыме. 2024-ше ийыште кеҥеж канышыш вич миллионат 300 тӱжем йочам колтымо лиеш да 39 тӱжемат 700 лагерьым почаш палемдалтеш. Марий Элыште 202 лагерьым почаш ямдылат. Тушто 31 тӱжем нрае йоча каналтышаш. Тидыже кодшо ийысе деч 16 процентлан шукырак. Республикыште школ пеленысе 178 лагерь,  ола деч ӧрдыжсӧ20  стационар, палаткан ныл лагерь почылтшаш улыт. Нуным почашлан ямдылалтмаш план почеш кая. Тиддеч посна 160 йоча Волжск оласе рӱдӧ эмлыме верын санаторийыштыже тазалыкым пеҥгыдемен кертеш. Россий кӱкшытан «Артек», «Орлёнок», «Смена», «Океан» йоча рӱдерлашке 200 наре йочам колташ палемдыме. Тыгак Марий Элысе лагерьлаште Российысе субъектла гыч 600 йоча: Белгород область гыч 350, 150- Запорожье область гыч, 100- Оренбург область гыч каналтен кертыт. 20 тӱжем наре йоча да ийготыш шудымо- влаклан кудывечысе площадке, школ лесничестве, поход, экспедиций, акций- влак ямдылалтыт. Тений кеҥежым «Икымше- влакын толкынышт дене Марий кеҥеж» фестиваль лиеш. Кеҥеж мучко арня еда кудывечыласе площадкылаште ныл тӱжем йочалан тӱрлӧ мероприятий- влак эртаралтыт. Тений йоча- влаклан кеҥеж канышыштым эртараш да тазалыкыштым пеҥгыдемдаш 78 миллион утла теҥгем палемдыме.
             Фото: Павел Стариков.